İran XİN ABŞ-ın nüvə obyektlərinə hücumunu kəskin qınadı: BMT-yə təcili tədbir çağırışı

İran İslam Respublikasının Xarici İşlər Nazirliyi ABŞ-ın İranın dinc nüvə obyektlərinə qarşı həyata keçirdiyi hərbi hücumları sərt şəkildə pisləyib və bu addımları “beynəlxalq hüququn kobud və görünməmiş şəkildə pozulması” kimi qiymətləndirib. Rəsmi Tehranın bəyanatında hücumlar İsrail rejiminin İran əleyhinə hərbi təcavüzünün tərkib hissəsi olaraq təqdim olunub və ABŞ-ın iştirakı terror və cinayət aktı kimi dəyərləndirilib.

İran XİN bəyan edib ki, hücumlar BMT Nizamnaməsinin 2-ci və 4-cü maddələrini, eləcə də Təhlükəsizlik Şurasının 2231 saylı qətnaməsini açıq şəkildə pozur. Bu səbəbdən, Tehran BMT Təhlükəsizlik Şurasının fövqəladə iclas keçirməsini və ABŞ-ın məsuliyyətə cəlb olunmasını tələb edir.

Bəyanatda həmçinin Atom Enerjisi üzrə Beynəlxalq Agentlik (AEBA) və digər beynəlxalq qurumlara çağırış edilib. İran həmin təşkilatlardan obyektlərə ciddi nəzarət və monitorinq aparmağı, eyni zamanda beynəlxalq ictimaiyyəti və qurumları ABŞ-ın addımlarına qarşı tədbir görməyə çağırıb.

Tehran ABŞ-ın bu hücumlarla regionda diplomatik prosesləri pozduğunu və yeni bir müharibə riskini artırdığını bildirərək, Vaşinqtonun İsrailin təcavüzkar hərəkətlərinə verdiyi dəstəyi də qınayıb.

Bəyanatın sonunda ABŞ-ın bu addımlarının təkcə regional sabitliyi deyil, həm də qlobal təhlükəsizliyi təhdid etdiyi vurğulanır. İran ABŞ-ı beynəlxalq hüquqa və etik prinsiplərə əməl etməyə çağıraraq, BMT və onun təsisatlarını bu açıq təcavüzə qarşı dərhal tədbir görməyə dəvət edib.

Gülnar