ParlamentAzərbaycan əleyhinə aparılan kampaniyaya dair açıqlama yayıb

 Milli Məclisin Xarici müdaxilələrə və hibrid təhdidlərə qarşı müvəqqəti komissiyası Rusiyada azərbaycanlılara qarşı aparılan geniş informasiya kampaniyasına münasibət bildirib.

Komissiyanın yaydığı açıqlamaya görə, Yekaterinburq şəhərində azərbaycanlılara qarşı baş verən qanunsuz hərəkətlərdən sonra Rusiya mediasında və Telegram platformasında Azərbaycana və rusiyalı soydaşlarımıza qarşı dezinformasiya xarakterli materiallar yayılıb.

“Soydaşlarımıza qarşı aqressiv münasibətin mediada təbliği və Azərbaycana qarşı qeyri-dost çağırışlar müşahidə olunub,” –  bəyanatda bildirilir.

Komissiya Azərbaycanın milli maraqlarına qarşı yönəlmiş hibrid təhdidlərə qarşı əvvəlki dövrlərdə də ictimaiyyəti məlumatlandırdığını xatırladıb və hazırda digər dövlət orqanları ilə birlikdə qabaqlayıcı tədbirlər gördüyünü qeyd edib.

Açıqlamada həm ölkə vətəndaşları, həm də xaricdə yaşayan azərbaycanlılar yalnız rəsmi dövlət qurumlarının məlumatlarına istinad etməyə çağırılıb.