İlham Əliyev Respublika Günü münasibətilə Tokayevi təbrik edib

Azərbaycan Prezidenti İlham Əliyev Qazaxıstan Respublikasının milli bayramı — Respublika Günü münasibətilə Qazaxıstan xalqını və ölkənin Prezidenti Kasım ‑Jomart Tokayevi təbrik edib.

Təbrik məktubunda vurğulanır ki, Qazaxıstanın iqtisadi inkişafı, əhalinin rifahının artması və beynəlxalq arenada nüfuzunun yüksəlməsi Tokayevin rəhbərliyi altında aparılan genişmiqyaslı islahatların və yorulmaz fəaliyyətin nəticəsidir.

"Xalqlarımızın ortaq tarixi-mədəni kökləri dövlətlərarası əməkdaşlığımızın əsasını təşkil edir. Qardaş ölkələrimiz arasında əlaqələr qarşılıqlı etimad və yüksək hörmət ruhunda inkişaf edir. Bu il imzalanmasının 20 illiyini qeyd etdiyimiz “Azərbaycan Respublikası və Qazaxıstan Respublikası arasında strateji tərəfdaşlıq və müttəfiqlik münasibətləri haqqında Müqavilə” dövlətlərarası münasibətlərimizin strateji xarakterini əyani şəkildə göstərir”, - məktubda qeyd edilir.

Sənəddə həmçinin bildirilir ki, siyasi təmasların intensiv olması və ali səviyyədə dialoqun mövcudluğu ticarət-iqtisadiyyat, energetika, o cümlədən yaşıl enerji, nəqliyyat, investisiya, informasiya texnologiyaları, mədəni-humanitar sahələrdə əməkdaşlığın dərinləşdirilməsi üçün münbit zəmin yaradır.

Azərbaycan Prezidenti məktubunda Tokayevə möhkəm cansağlığı, xoşbəxtlik və ali dövlət fəaliyyətində uğurlar, Qazaxıstan xalqına isə əmin-amanlıq, rifah və firavanlıq arzulayıb.