Prezident Qurbanqulu Berdiməhəmmədova zəng edib

Azərbaycan Prezidenti İlham Əliyev dekabrın 12-də Türkmənistan Xalq Məsləhətinin sədri Qurbanqulu Berdiməhəmmədova zəng edərək, ölkənin daimi bitərəfliyinin tanınmasının 30-cu ildönümü münasibətilə təbriklərini çatdırıb.

Dövlət başçısı Qurbanqulu Berdiməhəmmədova qardaş Türkmənistana uğurlar arzulayıb və Azərbaycan nümayəndə heyətinin Mərkəzi Asiya Dövlət Başçılarının Məşvərət Görüşündə iştirakını vurğulayıb. 

Zəng zamanı Prezident İlham Əliyev Heydər Əliyev Fondunun vitse-prezidenti Leyla Əliyevanın Türkmənistana səfərinə toxunaraq, Azərbaycan nümayəndə heyətinə göstərilən diqqət və qonaqpərvərliyə görə minnətdarlığını bildirib. Həmçinin Heydər Əliyev Fondu ilə Qurbanqulu Berdiməhəmmədov adına Qayğıya ehtiyacı olan uşaqlara yardım üzrə Xeyriyyə Fondu arasında imzalanmış Anlaşma Memorandumunun əməkdaşlıq göstəricisi olduğunu vurğulayıb.

Qurbanqulu Berdiməhəmmədov telefon zənginə görə minnətdarlığını bildirərək, Ümummilli Lider Heydər Əliyevin xatirəsini dərin hörmətlə yad etdiyini qeyd edib. O, həmçinin Azərbaycanın Mərkəzi Asiya Dövlət Başçılarının Məşvərət Görüşündə tamhüquqlu iştirakını dəstəklədiyini və Heydər Əliyev Fondunun səfərini yüksək qiymətləndirdiyini bildirib.

Telefon danışığı zamanı tərəflər qarşılıqlı maraq doğuran məsələlər və gələcək təmaslarla bağlı fikir mübadiləsi aparıblar.