İsrail Azərbaycana investisiya qoymaq istəyir - İsrailin XİN naziri

 Azərbaycan və İsrail arasında strateji münasibətlər hər iki ölkə üçün iqtisadi baxımdan qarşılıqlı fayda yaradır. Bunu İsrailin xarici işlər naziri Gideon Saar Azərbaycan xarici işlər naziri Ceyhun Bayramovla Bakıda keçirilən birgə mətbuat konfransında deyib.

Onun sözlərinə görə, 2025-ci ildə iki ölkə arasında ticarət əlaqələri artıb və ötən il təxminən 60 min israilli turist Azərbaycana səfər edib.

“İnanıram ki, 2026-cı ildə bu göstəricilər daha da yüksələcək”, –  Saar bildirib.

Nazir qeyd edib ki, İsrail kibertəhlükəsizlik və kənd təsərrüfatı sahələrində öz təcrübəsini Azərbaycanla bölüşməkdə maraqlıdır və ölkəyə investisiya yatırmaq niyyətindədir.

Saar vurğulayıb ki, yəhudi icması Azərbaycanda tarixən sülh və təhlükəsizlik şəraitində yaşayıb və bu, iki ölkə arasında münasibətlərin xüsusi xarakterini göstərir.

İranla bağlı danışan İsrail XİN rəhbəri bildirib ki, 6 oktyabr tarixində Tehranın İsrailə qarşı təzyiqləri müşahidə olunub. 

Onun sözlərinə görə, İran daxilində əhaliyə qarşı zorakılıq hallarının və genişmiqyaslı repressiyaların baş verdiyi şəraitdə bu ölkənin digər dövlətlərə münasibətinin necə ola biləcəyi sual doğurur.

“İsrail cəmiyyəti Azərbaycanın dostluğuna inanır və bu münasibətləri yüksək qiymətləndirir”, –  Saar əlavə edib.

Gülnar Nazimqızı