Azərbaycan və İran XİN başçılarının telefon danışığı olub

Azərbaycan Respublikasının xarici işlər naziri Ceyhun Bayramov ilə İran İslam Respublikasının xarici işlər naziri Seyid Abbas Ərağçi arasında telefon danışığı baş tutub.Bu barədə Azərbaycan Xarici İşlər Nazirliyi məlumat yayıb.

Nazirlər İran və bölgədə davam edən hərbi əməliyyatlar və hərbi eskalasiyanın yaratdığı vəziyyəti müzakirə ediblər.

İranlı nazir cari vəziyyət və atılan addımlar barədə məlumat verib. Bayramov bölgədə “facıəvi şəkildə gərginləşən” vəziyyətdən ciddi narahatlıq ifadə edib və İranın ali rəhbəri Ayətullah Seyid Əli Xameneinin və mülki şəxslərin həlak olması ilə bağlı başsağlığı diləklərini çatdırıb.

Hər iki nazir hərbi əməliyyatların tezliklə dayandırılması və dialoq yolu ilə həllə çağırışını vurğulayıb, mövcud vəziyyətin yalnız beynəlxalq hüquq normaları çərçivəsində həll oluna biləcəyinə ümid bildirilib.

Bayramov həmçinin vurğulayıb ki, Azərbaycan ərazisinin “qonşu və dost İrana qarşı hərbi əməliyyatlar üçün istifadə edilməsinə heç vaxt imkan verilməyəcək.”

Danışıqlarda qarşılıqlı maraq doğuran digər ikitərəfli məsələlər də müzakirə olunub.