Zahid Oruc: Yeni qərarlar dövlət idarəçiliyində vahid və şəffaf sistem formalaşdıracaq

Milli Məclisin İnsan hüquqları komitəsinin sədri Zahid Oruc Prezident İlham Əliyevin martın 19-da qəbul etdiyi qərarların dövlət idarəçiliyində yeni mərhələnin əsasını qoyduğunu açıqlayıb.

O, qeyd edib ki, bu dəyişikliklər yalnız əməkhaqqı artımı ilə məhdudlaşmır, dövlət qulluğunda vahid, şəffaf və ədalətli ödəniş mexanizminin formalaşdırılmasına xidmət edir.

Deputatın sözlərinə görə, uzun illər ərzində müxtəlif dövlət qurumlarında eyni funksiyanı yerinə yetirən əməkdaşlar arasında ciddi maaş və sosial təminat fərqləri mövcud olub. Yeni qərarlar bu disbalansı aradan qaldırmağa yönəlib.

“İlk dəfə olaraq qanunvericilik paketində konkret ödəniş cədvəlləri və maliyyə göstəriciləri əks olunur. Bu isə əməkhaqqı sistemində şəffaflığı artırır və ictimai müqayisə imkanlarını genişləndirir”, –  Zahid Oruc bildirib.

Onun fikrincə, yeni sistem dövlət qulluğunda “prestij fərqlərini” minimuma endirəcək və əsas meyar kimi peşəkarlıq ön plana çıxacaq.

Zahid Oruc əlavə edib ki, müəyyən edilən maaş diapazonları dövlət sektorunun əmək bazarında rəqabət qabiliyyətini artıracaq və özəl sektordan peşəkar kadrların cəlb olunmasına şərait yaradacaq.

Deputat vurğulayıb ki, islahatların uzunmüddətli təsiri pensiya sistemində də özünü göstərəcək. Belə ki, vahid və şəffaf əməkhaqqı mexanizmi gələcəkdə daha ədalətli pensiya təminatına imkan verəcək.

O həmçinin qeyd edib ki, bölgələrlə paytaxt arasında əməkhaqqı fərqlərinin azaldılması regional inkişaf baxımından mühüm addımdır.

Zahid Orucun sözlərinə görə, qəbul edilən qərarlar sadəcə maaş artımı deyil, dövlət idarəçiliyində şəffaflıq, ədalət və balans prinsiplərinə əsaslanan yeni idarəetmə modelidir.

Deputat sonda bildirib ki, bu dəyişikliklərin mahiyyətinin ictimaiyyətə düzgün izah olunması və onların sosial rifahın yüksəldilməsinə xidmət etdiyi diqqətə çatdırılmalıdır.