Bayramov və Ço Hyon ikitərəfli əməkdaşlığın genişləndirilməsini müzakirə edib

Azərbaycanın xarici işlər naziri Ceyhun Bayramov ilə Koreya Respublikasının xarici işlər naziri Cho Hyun arasında telefon danışığı aparılıb. Bu barədə Azərbaycan Xarici İşlər Nazirliyi məlumat yayıb.

Bildirilib ki, tərəflər Azərbaycan ilə Koreya arasında ikitərəfli münasibətlərin cari vəziyyəti və inkişaf perspektivlərini, həmçinin regional əməkdaşlıq məsələlərini müzakirə ediblər.

Danışıq zamanı Azərbaycanda həyata keçirilən layihələrdə Koreya şirkətlərinin iştirakının əhəmiyyəti vurğulanıb, iqtisadi sahədə əməkdaşlığın genişləndirilməsi üçün mövcud imkanlar qeyd olunub.

Həmçinin Azərbaycan və Koreya hökumətləri arasında iqtisadi əməkdaşlıq üzrə birgə Komissiyanın münasibətlərin inkişafında mühüm rolu diqqətə çatdırılıb.

Nazirlər Xarici İşlər Nazirlikləri arasında məsləhətləşmə mexanizminin və qarşılıqlı səfərlərin intensivləşdirilməsinin vacibliyini vurğulayıblar.

Tərəflər regional platformalar çərçivəsində əməkdaşlıq imkanlarını nəzərdən keçirib, müxtəlif sahələr üzrə qarşılıqlı fəaliyyətin genişləndirilməsini müzakirə ediblər.

Eyni zamanda, Koreya tərəfi Azərbaycanın UNESCAP çərçivəsində sədrliyini məmnunluqla qarşılayıb.

Telefon danışığı zamanı qarşılıqlı maraq doğuran digər məsələlər ətrafında da fikir mübadiləsi aparılıb.