Əliyev: Azad edilmiş ərazilərdə sənaye zonaları Böyük Qayıdışı sürətləndirəcək

İşğaldan azad edilmiş Qarabağ və Şərqi Zəngəzurda həyata keçirilən “Böyük Qayıdış” proqramının əsas məqsədi yüz minlərlə insanın öz doğma torpaqlarına təhlükəsiz və davamlı şəkildə qayıdışını təmin etməkdir.  Bu sözləri Prezident İlham Əliyev Ümumdünya Şəhərsalma Forumunun 13-cü Sessiyasının (WUF13) açılış mərasimində çıxışı zamanı deyib.

O qeyd edib ki, yaşayış evləri, məktəblər və xəstəxanalar tikilməzdən əvvəl ilk növbədə ərazilərin minalardan təmizlənməsi həyata keçirilir. Bununla yanaşı, hökumət məşğulluq məsələsinə də xüsusi diqqət ayırır.

“Artıq yaradılmış və gələcəkdə yaradılacaq sənaye zonaları insanların sürətli şəkildə geri dönüşünü dəstəkləyəcək”, - Əliyev bildirib.

Prezident əlavə edib ki, Bakı da son 20 ildə genişmiqyaslı ekoloji və şəhərsalma transformasiyasından keçib. Onun sözlərinə görə, XIX əsrdən etibarən neft hasilatı nəticəsində paytaxt ciddi şəkildə çirklənmişdi.

Əliyev bildirib ki, əvvəllər “Black City” kimi tanınan və ağır ekoloji vəziyyətə malik ərazi hazırda “White City” adı altında müasir şəhərsalma modelinə çevrilib.

Prezident həmçinin son 20 ildə Bakıda 100 park və bağın salındığını, onlardan 19-unun tam yenidən qurulduğunu qeyd edib.

Onun sözlərinə görə, paytaxtda ekoloji cəhətdən təmiz ictimai nəqliyyat sistemi, elektrik enerjisi ilə işləyən avtobuslar, metro və mikromobillik infrastrukturu inkişaf etdirilir.

Əliyev bildirib ki, BMT-nin Ümumdünya Şəhərsalma Forumu (WUF13) çərçivəsində Bakıda keçirilən müzakirələr və beynəlxalq təcrübə mübadiləsi Azərbaycanın şəhərsalma siyasətinə əlavə töhfə verəcək.

Gülnar Nazimqızı