İlham Əliyevin Ursula fon der Lyayenlə geniş tərkibdə görüşü olub - Yenilənib

İyulun 1-də Azərbaycan Prezidenti İlham Əliyev Bakıda Avropa Komissiyasının sədri Ursula fon der Lyayenlə geniş tərkibdə görüş keçirib.

Görüşdə çıxış edən Ursula fon der Lyayen Azərbaycanın Avropa İttifaqının strateji tərəfdaşı olduğunu bildirib və Aİ ilə Azərbaycan arasında münasibətlərin möhkəm təməl üzərində inkişaf etdiyini deyib. O, Prezident İlham Əliyevin Azərbaycan-Ermənistan sülh prosesində təşəbbüskar rolunu və liderliyini yüksək qiymətləndirib.

Tərəflər Azərbaycan və Ermənistan arasında münasibətlərin normallaşdırılması, davamlı sülhün təmin edilməsi, ikitərəfli ticarət əlaqələrinin başlanması, həmçinin Azərbaycandan Ermənistana neft və neft məhsullarının ixracı, eləcə də üçüncü ölkələrdən Ermənistana göndərilən yüklərin Azərbaycan ərazisindən tranzit daşınmasını müzakirə ediblər.

Ursula fon der Lyayen Avropa İttifaqının Azərbaycan və Ermənistan arasında sülh gündəliyini hərtərəfli dəstəkləməyə hazır olduğunu bildirib.

Görüşdə həmçinin Azərbaycanın Mərkəzi Asiya ilə Avropa arasında regional bağlantılarda oynadığı rol, Aİ ilə enerji sahəsində əməkdaşlıq və ölkənin Avropanın enerji təhlükəsizliyinə töhfəsi müzakirə olunub.

Fon der Lyayen 2022-ci ildən etibarən Azərbaycandan Avropa İttifaqına qaz ixracının artdığını qeyd edərək, ölkəni etibarlı enerji tərəfdaşı kimi qiymətləndirib.

***

Azərbaycan Prezidenti İlham Əliyevin iyulun 1-də Avropa Komissiyasının Prezidenti Ursula fon der Lyayen ilə geniş tərkibdə görüşü olub.Bu barədə Prezidentin Mətbuat Xidməti məlumat yayıb.