2020-ci ildən bəri 433 nəfər minadan zərər çəkib - Ceyhun Bayramov

Azərbaycanın xarici işlər naziri Ceyhun Bayramov İsveçrə nümayəndə heyəti və ATƏT-in fəaliyyətdə olan sədri İnyasio Kassis ilə keçirilən görüşdə ölkənin üzləşdiyi mina təhlükəsinin ağır nəticələrini və mövcud statistik göstəriciləri diqqətə çatdırıb.

Bayramov bildirib ki, 2020-ci il İkinci Qarabağ Müharibəsi başa çatdıqdan sonra keçən dövr ərzində 433 nəfər Azərbaycan vətəndaşı mina partlayışları nəticəsində həlak olub, yaralanıb və ya əlillik qazanıb.

Nazir vurğulayıb ki, azad edilmiş ərazilərdə minatəmizləmə əməliyyatlarının əsas yükü dövlətin öz daxili resurslarının — ANAMA, Müdafiə Nazirliyi, Fövqəladə Hallar Nazirliyi və cəlb olunmuş özəl şirkətlərin üzərinə düşür.

Problemin miqyasının ATƏT coğrafiyasında ən irihəcmli çağırışlardan biri olduğunu qeyd edən Bayramov təşkilatın və üzv dövlətlərin qabaqcıl təcrübəsindən istifadə edilərək Azərbaycanda konkret minatəmizləmə layihələrinin icra olunmasının vacibliyini ifadə edib.