Hikmət Hacıyev Ukraynanın III dərəcəli "Xidmətlərə görə" ordeni ilə təltif edilib

Ukrayna Prezidenti Volodimir Zelenski Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyevi III dərəcəli “Xidmətlərə görə” ordeni ilə təltif edib.Bu barədə Ukraynanın Azərbaycandakı səfiri Yuri Qusev “X” sosial şəbəkəsindəki hesabında bildirib.

Onun sözlərinə görə, Zelenski Ukraynanın bir sıra beynəlxalq tərəfdaşlarını dövlət mükafatları ilə təltif edib.

“Onların arasında Azərbaycan Prezidentinin köməkçisi Hikmət Hacıyev də var. O, III dərəcəli “Xidmətlərə görə” ordeni ilə təltif edilib. Təbrik edir və əməkdaşlığa görə təşəkkür edirik”, – səfir qeyd edib.

Hikmət Hacıyevin təltif edilməsi ilə bağlı fərman Ukrayna Prezidentinin rəsmi saytında dərc olunub.

Fərmana əsasən, Hacıyev və digər ölkələrin bir sıra rəsmi şəxsləri dövlətlərarası əməkdaşlığın möhkəmləndirilməsinə, Ukraynanın dövlət suverenliyi və ərazi bütövlüyünün dəstəklənməsinə verdikləri mühüm şəxsi töhfəyə görə mükafatlandırılıblar.