XİN Rusiyada Azərbaycan səfirliyinə qarşı təxribatı pislədi

Azərbaycan Xarici İşlər Nazirliyi (XİN) avqustun 27-də Azərbaycanın Rusiyadakı səfirliyinin qonaq evi qarşısında naməlum şəxslər tərəfindən ölkə əleyhinə təxribat xarakterli şəkillərin yerləşdirilməsini qətiyyətlə pisləyib. Bu barədə XİN-in məlumatında bildirilib.

Nazirlik qeyd edib ki, sözügedən təxribat Azərbaycan-Rusiya münasibətlərinin süni şəkildə gərginləşdirilməsinə xidmət etməklə yanaşı, son dövrlərdə Rusiyanın bir sıra media resurslarında Azərbaycana qarşı aparılan “çirkin və qərəzli kampaniyanın” tərkib hissəsi ola bilər.

“Azərbaycan tərəfi Rusiya Federasiyasının aidiyyəti qurumlarını bu kimi təxribatçı əməllərə lazımi hüquqi qiymət verməyə, insidentin hərtərəfli araşdırılmasını təmin etməyə və bu cür halların təkrarlanmasının qarşısını almaq üçün zəruri tədbirlər görməyə çağırır”, - məlumatda vurğulanıb.

XİN bildirib ki, Rusiya tərəfinin 1961-ci il Diplomatik Münasibətlər haqqında Vyana Konvensiyasına uyğun olaraq Azərbaycanın səfirliyinin və əməkdaşlarının təhlükəsizliyini lazımi səviyyədə təmin etməsi, həmçinin diplomatik nümayəndəliyin normal fəaliyyətinə mane ola biləcək təxribatların qarşısını alması gözlənilir.