Milix Yevdayevə "Vətənə xidmətə görə" ordeni təqdim edilib

Milix Yevdayevə 1-ci dərəcəli “Vətənə xidmətə görə” ordeni təqdim edilib.Bu barədə Dini Qurumlarla İş üzrə Dövlət Komitəsindən  məlumat verilib.

Orden Prezident İlham Əliyevin sərəncamı ilə Azərbaycanın ictimai həyatında uzunmüddətli səmərəli fəaliyyətinə görə Yevdayevə təqdim olunub.

Təqdimat mərasimində çıxış edən Komitə sədri Ramin Məmmədov Azərbaycanda dini tolerantlığın və müxtəlif konfessiyaların nümayəndələrinin dinc yanaşı yaşamasının ölkənin əsas xüsusiyyətlərindən biri olduğunu bildirib.

O, milli-mənəvi dəyərlərin qorunması, dini irsin yaşadılması və dini icmaların fəaliyyətinin dəstəklənməsi istiqamətində tədbirlərin həyata keçirildiyini qeyd edib.

Məmmədov həmçinin məscid, kilsə və sinaqoqların bərpa və yenidənqurma işlərinin aparıldığını, bu zaman onların tarixi-memarlıq xüsusiyyətlərinin qorunduğunu deyib.

Heydər Əliyev Fondunun da dinlərarası dialoq və əməkdaşlığın gücləndirilməsi istiqamətində layihələr həyata keçirdiyi bildirilib.

Milix Yevdayev göstərilən diqqətə və etimada görə Prezident İlham Əliyevə minnətdarlığını bildirib. O, ordenlə təltif olunmasını böyük şərəf və məsuliyyət kimi qiymətləndirib.

Prezident İlham Əliyevin iyulun 25-də imzaladığı sərəncamla Milix İlxananoviç Yevdayev 1-ci dərəcəli “Vətənə xidmətə görə” ordeni ilə təltif edilib.