Deputat torpaq analizlərinin qiymətinin kiçik fermerlər üçün azaldılmasını istəyib

Azərbaycanda torpaqların laboratoriya analizinin baha olması kiçik fermerlərin əkin üçün uyğun məhsulu müəyyənləşdirməsini çətinləşdirir. Bunu  Milli Məclisin deputatı Cavanşir Paşazadə bildirib.

“Fermerlər torpaq laboratoriyalarının qiymətlərinin baha olmasından şikayətlənirlər. Bu, kiçik fermerlərə torpaqlarını analiz etdirmək üçün heç bir şərait yaratmır”, - Paşazadə parlamentdə aqrar sahəyə dair qanun layihələrinin müzakirəsi zamanı deyib.

Onun sözlərinə görə, torpaq analizindən keçməyən fermer hansı məhsulun yetişdirilməsi üçün əlverişli olduğunu müəyyənləşdirə bilmir və nəticədə maliyyə itkisi ilə üzləşir.

“Bir çox fermer laboratoriya analizi aparmadan torpağında hansı məhsulu yetişdirə biləcəyini müəyyənləşdirməkdə çətinlik çəkir. Analizin qiyməti baha olduğuna görə vəsait ödəməkdən çəkinirlər, zərərini isə sonda özləri görürlər”, - deputat bildirib.

Paşazadə torpaq analizlərinin qiymətinə nəzarətin gücləndirilməsini və xidmətlərin kiçik təsərrüfatlar üçün əlçatan edilməsini təklif edib.

Deputat aqrar siyasətdə kiçik fermerlərin inkişafına ayrıca diqqət yetirilməli olduğunu da deyib.

“Kiçik fermer olmadan böyük fermer ola bilməz. O, əvvəlcə kiçik fermer olmalıdır ki, sonra böyüsün. Kiçik fermer yoxdursa, böyük fermer haradan yaranacaq?” - Paşazadə bildirib.

Gülnar Nazimqızı