Ceyhun Bayramov İƏT-ni islamofobiyaya qarşı birgə fəaliyyətə çağırıb

Azərbaycanın xarici işlər naziri Ceyhun Bayramov İslam Əməkdaşlıq Təşkilatının (İƏT) koordinasiya iclasında çıxış edərək artan islamofobiyaya qarşı həmrəyliyin vacibliyini vurğulayıb.

Azərbaycan Xarici İşlər Nazirliyinin (XİN) “X” sosial şəbəkə hesabında yayılan məlumata görə, Bayramov İƏT-nin yeni baş katibini təbrik edib və Azərbaycanın Fələstinin dövlətçiliyinə verdiyi dəstəyi bir daha təsdiqləyib.

Nazir artan regional hərbi münaqişələrdən narahatlığını ifadə edərək diplomatik səylərin intensivləşdirilməsinə çağırıb. O, həmçinin qlobal miqyasda müsəlman icmalarını hədəf alan ayrı-seçkilik və zorakılıqla mübarizə üçün İƏT çərçivəsində birgə fəaliyyətin vacibliyini qeyd edib.

İslam Əməkdaşlıq Təşkilatı 57 üzv dövləti birləşdirən beynəlxalq təşkilatdır. Təşkilat müsəlman ölkələri arasında siyasi, iqtisadi və digər sahələrdə əməkdaşlığın gücləndirilməsini qarşıya məqsəd qoyur. Azərbaycan İƏT-in üzvüdür və 2027-ci ildə təşkilatın sammitinə ev sahibliyi edəcək.

Bayramov iclasda 2027-ci ildə Azərbaycanda keçiriləcək İƏT sammitinə hazırlıq çərçivəsində görülən təşkilati və hüquqi işlər barədə də məlumat verib.

Gülnar Nazimqızı