REAL partiyası bağlansa Erkin Qədirli mandatından imtina edə bilər - İlqar Məmmədov

"Biz partiya olaraq qeydiyyatımızın ləğv olacağı təqdirdə Erkin Qədirli haqqında hansı qərar verəcəyimizi hələ ki, müzakirə edirik Azərbaycanda seçki sistemi majoritardır. Hər bir deputat partiyanı təmsil etməklə yanaşı, həm də öz dairəsinin seçicilərini təmsil edir. Bu baxımdan Azərbaycan seçki sistemi Böyük Britaniya və Amerika parlament sisteminə oxşayır. Avropada partiyaların intizamı daha yüksəkdir. Bizdə isə deputat həm özünü təmsil edir, həm partiyanı təmsil edir, həm də seçiciləri. Biz partiya olaraq qeydiyyatımızın ləğv olacağı təqdirdə hansı qərar verəcəyimizi hələ ki, müzakirə edirik. Amma ola bilər ki, vətəndaşlar hökumətin bu qərarına etiraz edərək Erkin Qədirlinin parlamentdən çıxmasını tələb etsinlər. Partiyamızın da belə bir qərar verməsi mümkündür. Hələlik bununla bağlı qəti bir qərar yoxdur, amma ola bilər", - Məmmədov iyulun 20-də keçirdiyi brifinqdə deyib.

 

Erkin Qədirli Respublikaçı Alternativ Partiyasının Siyasi Komitəsinin üzvü olaraq Milli Məclisinin VI çağırış deputatıdır. O, 2020-ci ildə keçirilən növbədənkənar seçkilərdə 16 saylı Yasamal II dairədə qalib olub. Erkin Qədirli Milli Məclisin Hüquq Siyasəti və Dövlət Quruculuğu Komitəsinin və Milli Məclisin Müdafiə, Təhlükəsizlik və Korrupsiya ilə mübarizə Komitəsinin üzvü seçilib.