Rusiya USAID-i ölkəsində qadağan etməklə düzgün addım atıb - Əliyev

"Onlar israrla yardım etmək istəyirlər. Amma biz yetkin insanlarıq, hər şeyi başa düşürük. Ona görə də Azərbaycanda bu məsələni tənzimləmişik. Məsələn, Azərbaycan mediası xarici mənbədən hətta 1% də maliyyələşdirilə bilməz. Niyə də maliyyələşdirilməlidir? Biz ABŞ-da medianı maliyyələşdirmirik. Bəs niyə onlar bizim mediamızı maliyyələşdirməlidir? Onsuz da "Amerikanın Səsi" və "Azadlıq Radiosu" kimi öz vasitələri ilə gecə-gündüz xalqımıza, ölkəmizə qarşı çirkab atırlar. Amma Gürcüstanda bu məsələ vaxtında tənzimlənmədi. Tənzimləmə həyata keçirildikdə isə bir az gec idi. Amma yaxşı haldır ki, indi vəziyyət sabitliyə doğru gedir," - İlham Əliyev vurğulayıb.

Bundan əlavə, Prezident İlham Əliyev The Washington Post, The New York Times, Le Figaro və Le Monde qəzetlərini "yalançı dördlük" adlandırıb.

"Qərb mediasının bir sıra nümunələri Azərbaycanı tənqid edən, COP29 iqlim konfransının burada keçirilməsinə qısqanclıqla dolu materiallar dərc edib. Bu, bizə çətinlik yaratmadı, amma sadəcə olaraq ikrah və nifrət hissi oyatdı," - İlham Əliyev VGTRK və RİA Novosti-yə müsahibəsində Bakıda iqlim sammiti öncəsi Azərbaycana qarşı aparılan media kampaniyasını şərh edərkən qeyd edib.

Əliyev bildirib ki, bu nəşrlərə qarşı ABŞ-ın seçilən prezidenti Donald Trampdan "fake news qrupları" ifadəsini götürüb. 

 

"Bu ifadə mənə çox xoş gəlir, düşünürəm ki, çox dəqiq və ünvanlı ifadədir. Bu "yalançı dördlük - The Washington Post, The New York Times, Figaro və Le Monde - Dövlət Departamentinin müxtəlif qeyri-hökumət təşkilatları ilə birlikdə diskreditasiya kampaniyasına başlayıb. Hər gün hücumlar edilir, hər gün, bəlkə də, ən azı bir neçə onlarla məqalə dərc olunurdu", - Əliyev vurğulayıb.