Ermənistan növbəti 2 il üçün sülhdən yayınıb - Elman Nəsirov

 

"Bu günlərdə Ermənistan Avropa İttifaqı ilə müşahidə missiyasının sərhəddə qalmasını təsdiq edib. Sülh müqaviləsində əsas bəndlərdən budur ki, sərhəddə üçüncü ölkənin nümayəndələri olmamalıdır. Deməli Ermənistan sülhdən yayınır. Ən azı bu proses 2027-ci ilə qədər uzadılır. Sərhəddə duranlar isə diplomat yox, kəşfiyyatçıdırlar. Onlar bugün mülki hərbi, sonra hərbi mülki olacaqlar", - deputat fevralın 3-də Milli Məclisdə çıxışı zamanı bildirib. 

 

Hazırda Ermənistanla sərhəddə 165 Avropa İttifaqının, 44 isə Ermənistanın müşahidəçi xidmət göstərir.  

 

 

2023-cü ilin yanvarın 23-də Avropa İttifaqı Şurası Ümumi Təhlükəsizlik və Müdafiə Siyasəti (CSDP) çərçivəsində Ermənistanda Avropa İttifaqının mülki missiyasının (EUMA) yaradılmasına razılıq verib. Missiyanın müddəti iki ildir. Avropa İttifaqının (Aİ) məlumatında deyilir ki, missiyanın məqsədi Ermənistanın sərhədyanı ərazilərində sabitliyə, regionda etimadın yaranmasına töhfə vermək və Avropa İttifaqı tərəfindən dəstəklənən Ermənistanla Azərbaycan arasında normallaşma səyləri üçün əlverişli mühiti təmin etməkdir.
 
2022-ci il oktyabrın 17-də Avropa İttifaqı Şurası regionda vəziyyətin monitorinqi, təhlili və hesabat üçün Azərbaycanla beynəlxalq sərhədin Ermənistan tərəfi boyunca 40-a yaxın monitorinq üzrə ekspertin göndərilməsi barədə qərar qəbul edib. Monitorinq qrupu bir ay müddətində regionda olub və missiyası başa çatıb.

 

 

 

Gülnar Nazimqızı