Prezidentin köməkçisi təyyarə qəzasından sonra Rusiya ilə münasibətlərdən danışıb

Azərbaycanın mülki təyyarəsinin Rusiya səmasında vurulmasından sonra yaranan gərginlikdə “müəyyən anlaşılmazlıqlar” və emosiyalar olub. Bunu Azərbaycan Prezidentinin köməkçisi Hikmət Hacıyev "EUToday" -ə müsahibəsində bildirib.

Hacıyev deyib ki, Bakının narahatlıqları Düşənbədə keçirilən sonrakı görüşdə müzakirə edilib. Azərbaycan Moskva ilə əlaqədə dörd tələb irəli sürüb: rəsmi üzr, hadisənin tam araşdırılması, məsul şəxslərin ədalət qarşısında cavab verməsi və təzminat ödənilməsi.

“Bu məsələlər həll olunduqdan sonra biz anlaşılmazlıq səhifəsini vərəqləyəcəyik və iki ölkə arasında normal qonşuluq münasibətlərini davam etdirəcəyik”, – Hacıyev əlavə edib.

Azərbaycan və Rusiya 1991-ci ildən diplomatik əlaqələr qurub. 2024-cü ilin dekabrında Azərbaycanın mülki təyyarəsinin Rusiya səmasında vurulması iki ölkə arasında diplomatik gərginlik yaratmışdı. Düşənbədə keçirilən görüşlər vasitəsilə məsələ sülh yolu ilə həll edilməyə çalışılıb, iki ölkə arasında ticarət və enerji əməkdaşlığı isə strateji əhəmiyyətini qoruyub saxlayır.

Gülnar Nazimqızı