Azərbaycanın qaz ixracının yarısı Aİ ölkələrinin payına düşür - Prezident

Avropa İttifaqının (Aİ) 10 üzv dövləti Azərbaycandan təbii qaz idxal edir və bu tədarüklərin genişləndirilməsi üçün əlavə potensial mövcuddur.Bunu Azərbaycan Prezidenti İlham Əliyev Bakıda Avropa Komissiyasının sədri Ursula fon der Lyayen ilə mətbuat üçün birgə bəyanatla çıxış edərkən bildirib.

Onun sözlərinə görə, strateji enerji tərəfdaşlığına dair memorandumun imzalanmasından sonra Aİ ölkələrinə qaz ixracı təxminən 65 % artıb.

"Bu gün qaz ixracımızın yarısı Avropa İttifaqına üzv dövlətlərin payına düşür. Hazırda Aİ-nin 10 üzvü Azərbaycan qazını idxal edir və bu coğrafiyanı genişləndirmək imkanları var", – prezident bildirib. 

İlham Əliyev enerji təhlükəsizliyinin milli təhlükəsizliyin əsas elementlərindən biri olduğunu deyib və Azərbaycanın neft-qaz infrastrukturunun inkişafına əhəmiyyətli siyasi, diplomatik və maliyyə resursları yönəltdiyini qeyd edib.

Prezidentin sözlərinə görə, uzunluğu 3 500 kilometr olan Cənub Qaz Dəhlizi Azərbaycanın təbii qazının Avropaya nəqlində əsas marşrut rolunu oynayır və enerji sahəsində Azərbaycan ilə Aİ arasında əməkdaşlığın nümunəsidir.