Biznes subyektlərinin fəaliyyəti qadağan edilə bilməz - Məmməd Muradov

"Turizm sahəsinə daxil olduqdan sonra müəyyən qaydalar var ki, onlara əməl etmək lazımdır. Qaydalara əməl edilməməsi isə qanunvericiliyə əsasən müəyyən cərimələrlə sanksiyalaşdırılır. Turizm bələdçilərinə münasibətdə hansısa məhdudiyyət nəzərdə tutulmayıb. Yanaşma bundan ibarətdir ki, turizm bələdçilərini turizm reyestrindən qeydiyyatdan keçmək üçün təşviq etmək lazımdır. Bu baxımdan turizm reyestrindən qeydiyyatdan keçən, eyni zamanda bələdçilik sertifikatına malik olan turizm bələdçilərinin ölkəboyu muzeylərə, qalareyalara girişinin pulsuz olması təşviqi yanaşma kimi götürülüb. Təşviqimiz ondan ibarətdir ki, sənayedə olan bütün turizm bələdçiləri mərhələli şəkildə sertifikatlaşdırmaya getsinlər", - şöbə müdiri bildirib.

 

Turizm bazarının tənzimlənməsi, turizm sahəsində sahibkarlıq fəaliyyətinin dəstəklənməsi, ölkənin turizm xidmətlərinin keyfiyyətinin yüksəldilməsi və turist məmnunluğunun təmin edilməsi məqsədilə 27 dekabr 2021-ci ildə qanun qəbul olunmuş və 18 fevral 2022-ci ildə isə qüvvəyə minmişdir. 5 fəsil, 22 maddədən ibarət olan Bu Qanun qüvvəyə mindiyi gündən "Turizm haqqında” 1999-cu il 4 iyun tarixli qanun ləğv edilmişdir. Qanunda turizm xidmətinin keyfiyyətinin yüksəldilməsi məqsədilə turizm iştirakçıları, turizm sənayesi subyektlərinin etik davranış qaydaları, reyestrdə qeydiyyatı, hüquq və vəzifələri, turizm vizalarının verilməsi kimi mütərəqqi yeniliklər təsbit edilmiş, turizm sahəsinin maliyyə mənbələri açıqlanıb.